الشغل مو عيب ... بس العيب ما تتطور

السلام عليكم ورحمة الله وبركاته

بداية اعتذر للاي شخص معارض لعمل الفيزيائي الطبي كفني اشعة  او غيره انا  وجهة نظري في الموضوع ذا ... (فليقل خيرا او ليصمت ) 

صحيح الواحد بيدرس ويتعب عشان في الاخير يلقى وظيفة حلوه ويستمتع فيها في مجاله

ولكن اذا مافي الوظيفة هذه ايش نسوي ...

اللي يزعجني في موضوع العمل خارج التخصص شيئين

1- الاستسلام ( وقل اعملوا فسيرى الله عملكم )

2-تحطيم المعنويات  اللي ماله داعي ( دعوا الخلق للخالق )

طبعا محد فهم حاجة , خليني احكيكم قصتي باختصار بعدين ارجع لموضوعنا

انا اتخرجت من الفيزياء الطبية زي ما الكل عارف , والحمد لله الان انا اعمل في مستشفى حكومي وفي نفس التخصص

وكل يوم بتعلم شي جديد وبستمتع في العمل بغض النظر عن ( ضغط العمل) الحاصل في بعض الاوقات .

بس من وجهة نظري بفضل الله وبعد الاجتهاد ماكنت حوصل لهذا المكان الا بعد عملي بالمستشى الخاص( كفنية اشعة ) 

اللي صار اني اتخرجت من الجامعة وانا عارفة وعلى يقين انه مافي وظايف للفيزياء الطبية الا بواسطة   ( اكبر كذبة صدقتها )

قدمت انا واتنين من صحباتي على مستشفيات كتيرة للعمل كفنية اشعة ( لان طبعا محد يعرف ايش يعني فيزياء طبية ) 

الين ما انقبلت في وحدة من هذه المستشفيات ... للامانه كان اصعب قرار قدمته وقتها اني اشتغل بشي ما اعرف عنه حاجة بس كفيزيائية خدمني الموضوع في معرفة الاساسيات منها ربطها بالواقع فتحمست للعمل , واتعلمت مرة كتير في الحياة العادية والمهنية:

• يعني ما فهمت فايدة او الفرق الحقيقي بين   kV و mAs  في الصورة وليش في ستاندر لها لكل عضو من الجسم الا بعد الخاص .
• عرفت كيف اشغل الاجهزة واتعامل معاها وليش احيانا تعلق >>> البعض يقول هذا عمل فني الاشعة مو شغلك وانا اشوف انه العكس ما حفهم شغلي اذا ما عرفت شغل الفني اول .
• وشوفت اخطاء الفنين وكيف انهم مابيفكروا بخطورة الاشعة ويتهاونوا مع نفسهم والمرضى والمرافقين للمرضى (الجمهور بلغة الحماية من الاشعاع ) 
• وغير كذا بيئة العمل وحدها تكفي انه الشخص يتعلم ويخرج من قوقعتة الصغيرة ويعرف الطيب والخبيث والمصلحة والالتزام .
• والاهم من هذا كله اكبر استفادة اخذتها من العمل في المستشفى الخاص هي دعوة المرضى لما اساعدهم لو بكلمة او اسناد او حتى اني اخلص عملي بس القى الدعوة  الحلوة اقل شي الله يعطيك العافية اللي تنسيني التعب والضغط اللي بالعمل  ... واللي افتقدتها اكتر شي من عملي في الحكومي لكون العمل اكثره مع الاجهزة والبيانات ونحوه وقليلا ما اتقابل مع المرضى .

للامانة انا كنت بشتغل في الخاص بس عشان الخبرة وكان اتفاق بيني وبين صحباتي انه نشتغل لستة شهور او بالكتير سنة واللي خلانا نصر على العمل في هذه المستشفى بالذات انهم حيفتحوا الطب النووي عندهم بالمستشفى ... يعني في امل انه نشتغل بتخصصنا.(كملت سنتين الا اربعة شهور في الخاص).

وهذا اللي سهلي وشجعني اكتر اني اقدم لاختبار الحماية من الاشعاع بالرياض عشان لازم الرخصه لفتح قسم الطب النووي

العجيب بالموضوع وانا اسميه تيسير الامور من الله سبحان الله انه ادارة المستشفى اختارتنا (الفيزيائيات ) مع اتنين من الفنين للتدريب على يد  البرفسور الدكتور محمد فاروق اللي كان يشتغل اول بمدينة الملك عبدالعزيز للطاقة المتجددة في الرياض قبل ما يتغير اسمها الان وكان هو من الاوائل اللي وضعوا الاسئلة والعارفين بالحماية من الاشعاع بالدرجة الاولى ماشاء الله عليه فاتعلمت منه كتير في نفس الوقت كنت مقدمة في  اعلان لمسابقة وظيفية في المستشفى ورحت اختبرت وعديت الاختبار وجاء وقت المقابلة وطبعا كنت لسه ما اخدت الرخصة وقتها ... شاء الله انه انا اقبل في وظيفة مسؤول الحماية مع اني بدون رخصة حماية من الاشعاع وقتها واللي كانوا منافسين لي في الوظيفة معهم الرخصة .

انا اعتقد اللي خلاني انقبل وقتها بعد توفيق الله  هو عملي بالمستشفى الخاص اللي عرف اللجنه اني انسانه جدية وعندي هدف من عملي بالخاص وانه عملي بالخاص حيساعدني في العمل في الحكوني اكتر بحكم معرفتي للتعامل مع الاجهزة فمايحتاج فني وقت عمل المعايرة ونحوه وطبعا التدريب اللي اكتسبته من الحرس  والخاص والدكتور فاروق والدورات اعطتني ميزات اهلتني للحصول ع الوظيفة رغم انه شرط الرخصة لم يحقق عندي .

طبعا بعد المقابلة باسبوعين تقريبا كان عندي اختبار بالرياض عشان الرخصة والحمد لله عديت الاختبار وتوظفت رسميا وانا حاصلة على الرخصة .

بعد الكلام الكتير هذا الخلاصة ...

الله يخليكم بلاش من التحطيم وتقليل عمل الغير , اذا انت في وظيفة حكومية وربنا سهلك او بتكمل دراسة وربي وفقك او حتى اشتغلت في مجال تخصصك او لسه بتدور وظيفة في تخصصك وعندك قناعة انه العمل يقلل منك اذا مو في مجالك فلتقل خيرا او اصمت وخلي افكارك لك لوحدك .

انت ماتعرف حاجة غيرك للعمل والضغط اللي هو في بحكم انه مو في المجال اللي درسه وقبل ما تتكلم هو عارف وزعلان على نفسه وما يحتاج تحطيم وتقليل منك . اذا انت تشوف العمل اذا مو في تخصصك ما تحتاجه وممكن تستنى لين ربي يفرجها غيرك ماعنده دخل ودارس عشان في الاخير يتوظف ومضطر للعمل في غير مجاله الين ربنا يفرجها . وانا هنا اقف احترما له ولاجتهاده في طلب رزقه ولعل عمله اللي فيه احسن من عملك يا فيزيائي واجره اكبر عند الله ... بس في المقابل يا عزيزي ويا عزيزتي اللي بتشتغل في الخاص لازم تحدد هدفك انت تبغى الوظيفة عشان وظيفة ولا عشان تقوي نفسك بها تتدرب فيها على التعامل مع الغير على الاعتماد على النفس وعلى ضغط العمل وبلاش من الاستسلام  وانه على لسانك طول الوقت مافي وظايف ومافي وظايف عشان كذا انا بشتغل في الخاص غير كلامك وحتى تفكيرك عشانك وعشان نفسك وسعادتك مثلا قول مالقيت وظيفة في مجالي عشان كذا رحت الخاص اطور من نفسي وادور وظيفة في مجالي بنفس الوقت الاجابية لازم منها . ويمكن سبحان الله تجد نفسك في عمل مخالف تماما عن تخصصك وتبدع وتستمتع به .

فان كنت سلبي تستاهل انك تتحطم ويقلل من عملك من قبل الغير لانك انت ما بتفتخر بنفسك وبعملك .

الموضوع كله يتلخص في  انه لازم يكون في هدف عندك ولازم تحققه وفكر بالخطة البديلة دائما اذا ماقدرت تحققه .

كثير من الفيزياءين اشتغلوا بشركات ومندوبين مبيعات واللي في العقار واللي واللي ... 

اللي بوصله لكم بلاش سلبية عشان نعيش مبسوطين ^________^

تحياتي لكم ..