يومياتي مع التدريب ^__^

بسم الله الرحمن الرحيم

والصلاة والسلام على خير خلق الله المرسلين .. سيدنا محمد وعلى اله وصحبه اجمعين

هذه الصفحه حتكون مدونتي عن تدريبي الميداني للفيزياء الطبيه في مستشفى الحرس بجده
فكرتها جات من صاحبتي نجوى ... يسعدها ربي
ان شاء الله حكتب كل فتره ايش اللي صار معايا في المستشفى .. وحأحاول بإذن الله اني ارفق صور للتوضيح
الله يسهللي ويسهلكم بنات ام القرى العزيزات ... وان شاء الله تستفيدوو من (قرقرتي) ^__^
بحاول ابعد عن افكاري السلبيه بقدر المستطاع .. وان قلت حاجه سلبيه فتأكدو ان قدرتي على التكتم والصبر قد نفذت.
وللتفريق بين كتابتي الجديده والقديمه سأرقم كل تحديث جديد بحول الله...

(1)

قبل كل حاجه حقولكم اول شي كيف تسجلي ع التدريب؟
لازم تكون اي بنت من قسم الفيزياء الطبيه مسجله في الايميل الرسمي للقسم
فايدة هذا الايميل ..
- متابعة حالتك الدراسية.
-يرسلك القرارات الجديده و(الخنفشاريه ) للقسم.
-يحدد ما اذا كنت مؤهله للتدريب او لأ.
الايميل هو
phystraining@uqu.edu.sa
وكل اللي عليك انك ترسلي تعريف باسمك ورقمك الجامعي وايميلك ورقم الجوال وسنة التخرج المتوقعه
ولما يحين موعد التدريب حيجيك خبر اكيد

التجهيز للتدريب .. 
حاليا حتكلم عن نفسي وايش اللي جهزته  ^^

- اول شي لازم يكون عندك خطاب من جهة التدريب (د/سمير نتو ) يفيد بأنك طالبه فيزيائيه طبيه وحتدربي في المستشفى الفلاني .
نحن  لم نختار المستشفى كان توزيع الطالبات من قبل الدكتور سمير ففي بنات في مستشفى الملك عبدالله في المحجر وفي بنات في المستشفى الجامعي ونحن في مستشفى الحرس في جده .

- كنت لما اذاكر مواد الفيزياء اكتب ملخص عشان النهائي وماكنت اتوقع اني بستفيد منها .... هذه الملخصات رجعت كتبتها تاني .. وكتبت الاشياء اللي ممكن استفيد منها بالإضافه للي اخدتو في دورة الدكتور سمير . بكذا خفت الرهبه من التدريب شويه 
مادة التصوير(د/رمضان) .. فيها الاجهزة والكواشف لها
مادة الفيزياء الطبيه (د/رمضان) ... فيها التفاعلات المهمه للإضمحلال والكواشف الشخصيه
مادة العلاجيه (د/عايده) ... كلها مهمه خصوصا المسرع الخطي وفي الدورة تبع الدكتور سمير نتو ركز عليها وفسر المادة اكتر
مادة الاشعاعيه (د/عايده )... تشبه الطبيه بس بتوسع اكثر
الحيوي والاعشيه والمحاليل مافتحتها لأن للأسف ضاعت ملخصاتها

- اللاب كوت الابيض ( اختذته طويل ... لانه استر واريح )

- دفتر للملاحظات + قلم + مسطرة + اله حاسبه <<< دكتور سمير وصى بها في الدورة

- طبعا السيارة اللي حتوصلك لاتنسيهاا ... امزح ^^ بس من جد هي اكبر عائق خصوصا ان التدريب في جده

- صورة من ورقة الخطاب للطوارئ

التدريب حيبدأ يوم السبت ان شاء الله ... الله يسهلها .. ويحببنا في التدريب ... ونستمتع ان شاء الله



(2)
اول يوم دوام ...
رحنا المستشفى بدري الساعة 7 تقريبا ... ودخلنا من مركز الاميرة نورة للاورام
جلسنا نراجع ملخصاتنا ...
ولبسنا اللاب كوت << وربي الاحساس شي خيالي ... جميل .. جميل ... جميل

والساعة 8 دخلنا للقسم العلاج الاشعاعي ... وعلى قسم الفيزياء الطبيه
8 ونص جا الدكتور فتحي اللي مفترض انه مسؤول عن تدريبنا .
المهم اخدنا دورة سريعه ع الاجهزة ... بعد كذا جلسنا ننتظر الدكتور عبدالحميد رئيس القسم هناك عشان يحدد وضعنا
الى الساعه 9 ونص تقريبا ... بالرغم من ان الوقت قليل الى حد ما ,,, الا اننا لما كنا هناك كأنه (ماشي على قشر بيض )
ملل الانتظار + تعطيل مصالح ... المهم دكتور فتحي سألنا عن معدلاتنا بعد هذه الفتره الطويله .... وقال انا انصحكم تروحو اليوم وتجونا الاسبوع الجاي لانو دكتور عبدالحميد مايقبل دحين ...
 ( قبل التدريب وايام الدورة تبع الدكتور سمير سألنا عبدالحميد عن معدلاتنا وقال انه اقل من 3 ماحيقبل انهم يدربو عنده  )

الكارثه انو لما كنا حنخرج من الغرفه هو دخل O___O  طبعا اتبلمنا,...
 وللأمانه أو ما عرف اننا بنات تدريب رفض من قبل ما يسأل عن المعدلات .. بحجة انه ما يقبل بنات في الصيفي ... وانه مافي دكاتره يشرفو علينا ...
جلس يبرر كتير موقفه وانه ماهو موافق بتاتا اننا ناخد التدريب صيفي ... وسأل اذا كان هناك شي بديل ...
بعد كذا بعد ما اقر انه ماايبغى بنات للتدريب في فترة الصيف , سألنا عن معدلاتنا ... اللي شفته انه ماكان العائق الاولي المعدلات ..
 فقلت له : دكتور سمير هو اللي وزعنا بكيفه واحنا ما اشترطنا انه يكون التدريب هنا ... والبنات الباقين اتوزعو ع المستشفيات التانيه
فأتصل  على الدكتور سمير ,, بس للأسف جواله كان مغلق .
سكت شويه ... وبعد كذا رجع قال انه ما يبغى تدريب صيفي وانه غير موجود ...
واحنا زي الشطار سحبنا نفسنا  وهو يقول الله يوفقكم <<< كنت شويه وحأقتلو


واحنا من الصدمه ما حسينا بشي وقتها ...لا قهر ولا شي بس تبلد ^^
المهم استغلينا اشكلنا (لانو كلنا لابسين لاب كوت ) .. واخدنا لفه في المستشفى على اساس اننا دكاتره لين ماجاتنا السياره
بعد كذا شهد دقت على الدكتور سمير .. وقال انه حيشوف الموضوع ويرد علينا
ورجعت اتصلت عليه بعد المغرب , وقالنا خلاص حتداومو بس الاسبوع الجاي
<<< مدري ليه حاسه اننا بنتدرب تهريب ههههه


العبرة :
- لما تاخدو التدريب .. اكدو على نسبكم قبل ماتتوزعو ع المستشفيات
- اذا كان صيفي ... اتأكدو من المستشفى انهم يقبلو التدريب فترة الصيف
-لو كان عددكم كبير ممكن يرفض التدريب عندهم (احنا 3 وقال انا كنت ابغى اثنين بس )


... اللهم علمنا ما ينفعنا وانفعنا بماعلمتنا وزنا علما




(3) 

اول يوم للتدريب ...
تعب تعب تعب <<<< بس عشان اللي حيدرب المفروض يهيأ نفسه
حسيت اني خسيت 10 كيلوو ^^!

اليوم بدأنا دوام ولله الحمد , ودكتور عبدالحميد بدأ اجازته ما ادري حظنا حلو ولا خسرنا معلومات كتير ( معروف انه دكتور عبدالحميد مايرحم اللي بيدربو عنده ويطالب ببرزنتيشن ودايما يسأل اسئله ويقول للبنات اقرأوو <<< كلام البنات اللي اتدربو في وجوده )
المهم اللي صار معانا , جينا بدري ووزعنا الدكتور فتحي ع الاجهزه , وانا كنت في المسرع الخطي ... بس مو هنا المشكله ..
المشكله ان اللي مسؤولين ع الجهاز ( اسمهم الثيربي ) ما يعرفو عربي ابدا .. والمشكله الاكبر اني ما اعرف انجليزي زيهم .. كل اللي سويتوو هو اني صرت مترجمه لهم ^^ ... يعني لما يدخلو المرضى بيرتاحو انهم يقدرو يفهمو مني حاجه .
الثيربي هم سكينه وفريد ... في البدايه كانت سكينه بتشرح لي اللي بتسويه ... والحمد لله فهمت ثلاث ارباع الكلام ..

طبعا كما هو معروف المسرع الخطي هو جهاز علاجي ... في غرفة الثيربي5 كمبيوترات الاول يعطي صورة live للي بيصير داخل غرفة المسرع .. والثاني بيعطي معلومات المرضى ومواقيت علاجهم ومنه يفتح ملف المريض وينتقل للحاسب الثالث اللي يتم المعايره عليه وتحريك الـجانتري  والحاسب الرابع له يعطي المعلومات السابقة للجرعه والحاسب الخامس توضيح صورة الx-ray  ومطابقتها للمريض ..
اللي كنت بسويه طوال الوقت اني الحق ورا الثيربي وبس .. اول شي ننادي المريض ... ندخله غرفة المسرع ونثبت (عملية التثبيت جدا دقيقة ) والتثبيت حسب المعلومات المطلوبه للوضعيه الصحيحة للمريض ... فيحركوا الجانتري والكاوتش(السرير ) حسب المعلومات , كل ما جيت اعمل حاجه قالولي No No No ... بعدين اكتشفت انه انا شغلتي اعرف بس فكرة عمل الجهاز ... طبعا بعد ما يثبت المريض ويعاير الجهاز نخرج كلنا من الغرفه وبسرعه واخر واحد يضغط على زر لإغلاق الباب.
يبدأو بعد كذا التحكم في الاشعااع  ومعدل الجرعة من الخارج حسب طريقة معين بعمل مشترك للأجهزة الخمسه .
تخلص الجلسه ونرجع تاني للغرفه لتحرير المريض ^^ . وهكذا يتكرر العمل ولكن بإختلاف مكان الورم ومقدار الجرعة وطريقة التثبيت ..

بصراحة هذه التجربه مؤلمة وجميله في نفس الوقت
مؤلم لان اول مره اعرف انه مرضى السرطان بهذا العدد بإختلاف الاعمار من صغير لشايب
الحمد لله ع العافيه , وربي حاجة تفجع وتؤلم خاصة لما يجي صغير مصاب بالورم ... الله يشفيهم ياارب

استخراج البطاقة : 
المهم جاء وقت استخراج بطاقة العمل ... الساعة 10 ونص تقريبا
اول شي رحنا مركز التدريب ... بباص من المستشفى للمركز ... المركز في مجمع كأنو بيوت صغيره ... دخنا لين لقيناه على اليسار
من المركز .. في المركز وريناهم ورقة الخطاب  وكانوا طالبين الاسم عربي وانجليزي والفترة اللي حندرب فيها وفصيلة الدم رقم السجل المدني ... بعد كذا طلبنا لموزين عشان نوصل لمركز الامن ومنه استخرجنا البطاقه وكانت الساعه تقريبا 11ونص .. دقينا ع اللموزين تاني وكان مافي احد فإضطرينا اننا نروح ع المستشفى برجولنا ... وامتصينا اشعاع طبيعي ساااخن جدا .

بس ورجعت للجهاز وخلص اليوم.


نصيحة مجربه T____T:
- اذا ممكن انك تأجلي التدريب عشان تاخدي دورة انجليزي فأجليها نصيحة لوجه الله
- التشريح ثم التشريح ثم التشريح ,,, مهم جدا تعرف كل عضو واسمه بالانجليزي
- اياك ثم اياك تلبسي جزمه ماهي مريحه ولو شويه ... لانو الشويه بتصير كارثه هناك من كثرة المشي




(4) 

تم توزيعنا على الاجهزة بحيث اننا نتناوب الاجهزه كل جهاز يومين ..
انا بدأت على المسرع الخطي 2 ..ثم المسرع الخطي 1 ... ثم غرفة الفيزيائين ...ثم CT ...
واليوم نفس اللي  في اليوم الاول ... مجرد ملاحظة عملهم ...
بس يمكن من حظي انه كان اليوم  احمد (فيزيائي ) >من جنوب افريقيا كأنو امريكي ومايعرف ولاشي في العربي بس لغته سهله < بيعمل تشيك ع الاجهزة في فترة البريك (للثيربي) وكان في خلل بسيط بالجهاز وعدله
طلبت منه انه يعلمني كيف نشيك ع الاجهزة وماشاء الله ماقصر ... بس في كم حاجة سقطت مني لانه مايعرف عربي
الشي الغريب العجيب انه قال انه لغتي كويسه << اشك انه مايعرف انجليزي ههههههه

والجديد اليوم  اننا رحنا لمطعم المستشفى عشان نتغذى وكنا نحسب الاكل مجاني ... بس من فضل الله انه اخذنا محافظنا معانا
كنت خايفه انه الاكل مايكون لذيذ ... بس طلع جيد
تقيمي له 8/10

السلطة هذه نصيح لاتتهوروو وتاخدو منها ... مايونيز ومكرونه وفواكه كيف تجي مدري
ولا حاولت اذوقها بس ذا من تعريف البنات لها

بعد الغذاء اخذنا سامر<فيزيائي > (كان رافض اننا نقول له دكتور لانه  ماصار دكتور ) على قاعة الاجتماعات
شرحلنا وبسطلنا بصراحة واعطانا فكرة عامة على اللي بيصير في المستشفى او بالاصح في هذا القسم من المستشفى
وحددلنا هذا الوقت من كل يوم يشرح لنا فيه شي جديد ..

الفائدة : 
- لازم لو تبغي تتعلمي تسألي وتطلقي العنان للسانك لانه شبه من المستحيل انهم يعطوكي معلومات لوماطلبتيهم .
- لازم اي معلومه اخذتيها من الفيزيائين تكتبيها لانه دكتور فتحي قال انه حيسألنا فيها , لانه بيسأل الفيزيائين عن اللي علموكي .
- لازم تكون عندك ملخص للأجهزة وكيف عملها بإختصار .
- نصيحة لاتضيعي فترة الغذا ... واشربي عصير ع الاقل .

( 5)

اخر يوم في الاسبوع الاول كنت في غرفة الفيزيائين ..
كنت شايلة هم انهم حيسألوني ويعزبوني ... بس الحمد لله ماصار شي سيئ
احمد جاته حاله جديدة وكنت بس بتفرج من بعيد ايش بيسوي .. فأنتبه لي وصار يشرحلي ايش اللي بيسويه
كان بيعمل تحديد على الاعضاء الحساسه اللي لازم نحميها من الاشعاع
وكل حاجة بيحددها بيختار لون التحديد يحفظة بأسم العضو ..

هذه الصورة توضح بعض الاعضاء وكم الجرعة اللي لازم ماتوصلها 

بعد كذا جات الساعة 12 وكان بيشيك( QA) ع الاجهزة التشيك الشهري
مختلف تماما عن اللي سواه اول ... الاول كان بسرعه وخلص في ساعة تقريبا على الغرفتين T2,T1 يعني غرفتا المسرع الخطي
اما التشيك الشهري كل جهاز لوحده وياخد وقت طويل تقريبا 3 ساعات فيكون عمل الثيربيي لين 12 واحمد يبدأ بعدهم
شيك على حجم الفيلد ودوران الجانتري والليزر اللي يستخدم للتحديد ودوران السرير والمسافه مابين السرير والمصدر وشيك على حركة الملتليف كلوميتر وحركة الكلوميتر وبعدكذا شيك ع الفوتون وع الالكتون وكل واحد بكذا طاقه ...
وكل حاجة كان لها طريقة او جهاز للتأكد من دقته واي غلط او صحه تنكتب ع الكمبيوتر في جداول مرتبه
كان مع احمد دكتور نور >باكستاني لغته قالبه اوردو < هذا الدكتور بدل عبدالحميد في الاسئله .. قالنا اتكلمو مع بعضكم انجليزي وكل مايشوفنا يسألنا ... ويعطينا واجبات ... الله يستر منه بس

االحمد لله خلص الاسبوع الاول على خير ,,, بس من جد كان طويييييل


ملخص خارج المستشفى
اول يوم دوام كان مرره تعب لانو ما اتعودنا لسه على الدوام ... يعني رجعت البيت الساعة 6 ويادوب اذن المغرب صليت ونمت
طبعا كسل مو طبيعي ... ونوووم مو طبيعي ... يبدأ يقل ويتعدل يوم بعد يوم
في البدايه ماكنت اشوف احد او اتكلم مع احد في البيت ..
من الساعة 6.30  صباحا خرج من البيت ونرجع 6 واغلب التعب من الطريق اللي غالبا ما اكون نايمة فيه ههههه




(  6)
 الاسبوع التاني من التدريب
المفترض يكون مكمل للمكان اللي كنا فيه بس اتأجل لاسبوع كمان واتقدم قسم اتشخيص لهذا الاسبوع
المهم نحن طلبنا ان نكون في التشخيص عشان نبغى نشوف الاجهزة والصور
في البدايه كان الشي صعب جدا وكل اللي هناك كان بيسأل احنا ليش جينا عندهم بما اننا فيزياء
ماشاء الله في هذا القسم ماقصروو ابدا .. خلونا نمسك الاجهزة وشرولحنا واتعلمنا حاجات مرره كتير
وكما الحال في قسم العلاج ... كل وحدة على جهاز
الجميل في القسم ماحسسوكي انو غلط انتي ما تعرفي انجليزي بطلاقه ... وانهم  يخلوكي تعرفي شغلهم كله .
كنا نجلس عندهم من 8 - 12 عشان عندنا محاضرة سامر
فنلحق نصلي ونتغذا ونكتب اللي اخذناه ونرجع تاني لقسمنا
التقسيم كان .. يوم في الرنين المغناطيسيMRI , ويوم في الـ CT التشخيصي , ويوم في الصوتيات US ويوم في X-RAY  العادي ويوم في الـ X-RAY الفلوروسكبي

التحديث القادم بحول الله اكتب كل واحد ايش صار فيه

ملاحظة : 
الدقة هنا تختلف عن الدقة العلاج ... صحيح في دقه لكنا تعتبر ولاشي بجانب العلاج
غير كذا هنا المرضى كتير والوقت في التصوير جدا قليل .. بعكس العلاج كان الوقت اطول



( 7)
اليوم الاول في التشخيص ....
رحنا متأخرين للأسف تقريبا 9ونص لاننا دخنا لين لقينا مكان التشخيص ... اللي كان اساسا في مكان واضح وكل يوم نروح له
التشخيص امام المطعم اللي سبق اتكلمت عنه ..
كنت في  MRI ... بصراحة ماكنت اعرف شي عنه غير انه بالمغناطيس بس كيف صار وليش كله عرفته من واحد اسمه محمد مصري وينادوه ابو عمر ماشاء الله ماقصر ... قلي اكتبي اسألتك وانا حجاوبك ... وماشاء الله عليه ماقصر شرح لي كل حاجه وكان حيعلمني ع الجهاز بس للأسف جات الساعه 12 واحنا لازم نحضر لسامر .. بس علم البنات الباقين .... بالاصح اعطاهم فكره عن اللي بيسووه ع الجهاز .
العجيب انه كان في مرضى شفتهم في T1  اخذولهم صورة رنين .... اكتشفت فيما بعد انه احيانا الدكتور يحتاج صور الرنين اذا كان الورم ماهو واضح في CT بحيث انه يطابق صور الجهازين فوق بعض ... يحدد على  CT  ويتأكد من الورم في MRI
وتاني يوم المسؤول عن هذا الجهاز شرحلنا كمان وماقصر ...
صحيح اشكالنا غلط عندهم بس جميل العمل هناك .... وجميل تعاملهم خفف وسهل كتير اشياء .

نصيحة :
اللي حاب انه يروح التشخيص لازم يقرا شوية عن هذه الاجهزة وكيف بتشتغل عشان استيعاب اللي بيصير هناك

(8)
تاني يوم رحت ع الصوتيات US جاتنا حالات كتيره انا ماشفت غير كشف الصدر والبيبي ... كان نفسي اشوف وحده حامل والجنين في بطنها .. بس للأسف الحوامل من عيادتهم يتصور الجنين عندهم ..
الشي شويه صعب والصور جدا مختلفه واصعب في انك تحددي موقعها يعني تختلف عن CT & MRI & X-RAY في كل شي .
بس اسهل واسرع في طريقة العمل واكثر الاجهزة امانا للمرضى .
كنت مع وحده فلبينه وكانت بتفهمني ع الصوره كيف انه الضل يبين المرض ..

بعدها رحت ع CT  كل اللي كان هناك اجانب ... بس جا واحد كان في ال MRI  شرحلي ماقصر ... وخلوني اساعدهم ودخلت كم مريض .. وصرت مترجمه ومشي الحال .. 

بعدها رحت ع الاكس ري فلورسكبي ... اللي بيعطي صور حيه ... بصراحه ما اتخيلت انه كذا ... الفلورسكبي نفس الاكس ري العادي بس ذا خاص للعمليات والمرضى اللي حتاجوو الجرعة في مكان محدد وعادة يستخدمووه لو بيدخلو انبوبه للمعده مثلا فلازم يعرفو سير الانبوبه في الجسم ... وفي جرعات (ابر) لازم يوقع عليها المريض قبل ماياخدها ... يأكد بها ان المستشفى تخلي مسؤليتها عن اضرارها وانه اخذها بإرادته وعلى الجهاز يبين اذا كان مكان الابرة صحيح او لأ و بعد التأكد تحقن الابرة 
بصراحة اكتر مكان وجعلي قلبي ... لانو بيجو المرضى ويتألمو وقت الجرعه والله شي يعووور القلب .
اخر يوم في التشخيص احلى يوم بالنسبه ليا ... كنت في الاكس ري العادي (الكاسيت ) شي جمييييل كانت ماسكتني وحده فلبينيه خلتني اشتغل كتبت في السجل ارقام المرضى واسمائهم واسمي واسمها في المصورين الاشعاعين وغير اني كتب على صبورتهم الحالات اللي حتجي للكشف ... وخلتني ادخل المريض وشي مررره كان حلووو حسيت اني مهمه في المجتمع ^__^.




(9)
في الاسبوع حقت التشخيص كنا نخلص من عندهم 12 وبعدها نصلي ونتغذى ونرجع القسم <<< احنا طلبنا كذا عشان محاضرة سامر
المهم يوم الاثنين جات حاله لها تقنية جديدة بس الدكتور فتحيوالدكتور عبد الحميد اللي يعرف يتعامل معاها ويعمل خطة العلاج .. اسم التقنيه .. استريوتكتك  حاجه جميله بس صعبه ودقيقة جدا ... جميله لانها جلسة وحده ويتنهي العلاج ... الصعب انها عادة تكون لاورام حميده او اورام صغيرة جدا لم تنتشهر ... فيسلط على الورم جرعه عاليه في زمن قصير ... ممايؤدي الى خطووورة في الخطأ البسيط ...من كثر دقتها يستخدمو الكميرا التحت حمرا لتحديد مكان الورم اليا وعلى الستنر تمام ...
لما صارت الحاله صار في توتر غير معقول في المكان لدرجة اننا اتوترنا احنا كما ... الفريق اللي كان موجود جدا جدا جدا كبير
من غيرنا 11 شخص ومعانا 14 شخص ... بس الحمد لله عدت على خير .. والتوتر اللي نتج انه التقنيه جديده وخطيره وهذه كانت تاني حاله لهم ... اساسا طريقة التثبيت والقناع المسنخدم على التثبيت كان شي مختلف عن كل الحالات اللي شفناها قبل.
وفي نفس الاسبوع يوم الثلاثاء  كان موعد ال QA  او التشيك ع الاجهزة الشهري بس لل T2 ... مع احمد  ,ونفس اللي سواه على T1
جدا جدا جدا جميل ... شيك على جودة الشعاع والكلوميتر ومعدل الجرعه وحركة السرير والجانتري والايزوسنتر والSSD  وحاجات كتيرة.. .. احمد اكتر انسان خلوق عجبني تعامله في القسم (يعلم بأسوب سهل من غير مايمزح او يعطي مجال للمزح معاه بتعبير افضل محترم  ) .



(10)
الاسبوع الثالث 
رجعنا كملنا في قسم الاورام وتبادلنا اماكنا اللي كنا فيها الاسبوع الاول للتدريب .. 
 كملت في الفيزياء ... ايمان جلست تشرحلي اللي بتسويه على الجهاز وانواع او طرق وضع الخطط للعلاج ... فهمت حاجات كتير وطلعت لي تساؤلات اكثر .. 
بعدها رحت على ال CT SAM اللي يعتبر اول مكان يدخلة المريض عشان يثبت بمثبتات حسب مكان الورم وهذا يختلف من مريض لمريض وهي نفس الوضعية اللي حيثبت فيها في T1 & T2  اللي هي اساسا مهمة عشان خطة العلاج تكون صحيحة
هذا ال CT مابيختلف عن اللي في التشخيص غير في حاجتين اساسية هي السرير والليزر .
واخر يومين من هذا الاسبوع رجت على T1 بس رجعت وانا فاهمة اللي بيصير وصرت اعرف ايش اللي لازم يصير ... حتى انه الثيربي اللي كانت هناك اتفاجأت اني اعرف ايش اللي لازم يتغير في السرير وصرت اساعد في التغير فقلت لها انا فيري قوود(جيدة جدا ) صح قالت لا انتي اكسلنت ( ممتازة )
عاد سمعنا هرجة انو دكتور عبدالحميد حيداوم بعد اسبوعين وأكتأبنا بس مشينا الموضووع عادي ...

ملاحظة :
في البداية من جد ماكنت فاهمة ولا عارفة وشي وكنت مكركبة ومتخلبطة وكنت متوقعة اني ما حستفيد شي .
لكن مع الوقت ولما مريت ع الاجهزة وكثرة الاسئلة اللي انسألتها وسالتها فادتني مررة كتير
ما حقوول اني صرت بيرفكت بس اتحسنت عن اول مرة كثير .. حتى اني صرت افهم انجليزي احسن من اول مع اني ما بتكلم مع احد كتير


(11)
 الاسبوع الرابع 
كنا تعبانين من جد ... والمعلومات اللي اخدناها كلها اتشعترت مع بعضها وصار عندنا حاجات في الدفتر وحاجات في الاوراق  من جد قربعة المهم طلبنا اجازة يوم السبت واعطانا هي دكتور فتحي ... احلى اجازة اخذتها ^___^
(نصيحة اشتري دفتر كبير للكلام والشرح الطويل ودفتر صغير لجيبك وتكتبي فيه اللي بتشوفيه واسألتك عشان لا تتلخبطي زينا
ويفضل انك تقسمي الدفتر للتشخيص والاورام ويكون في نفس هذا الدفتر المعلومات الاساسية اللي تكوني متوقعة انك لازم تعرفيها قبل ماتبدأي التدريب ... من جد تشتت فضيع حتكوني فيه اذا ماسويتي كذا )
المهم جينا يوم الاحد وكنا طالبين اننا نزور الطب النووي ... المهم الدكتور فتحي قال يكفيكم يوم واحد
كنا زعلانين في نفسنا ومقهورين ... بس لما رحنا من جد ماكان يحتاج يوم كمان ... هناك ماشاء الله كان في دكتور اسمة عبدالكريم ارسلنا له ... شرحلنا عن الجاما كميرا وانه الاشعاع هنا من المريض وليس من الجهاز وورانا غرفة الحقن وغرفة جهد القلب وغرفة التأكد من الجرعة وحاجاات كتيرة ..... بصراحة احلى نتيجة حسيت انها تطلع في التشخيص من هذ الجهاز لانها بتوضح الاورام الدقيقة بس كانت الصورة جدا بطيئة وتاخذ وقت مرة طويل ..
اللي يشتغلوا هناك مررة جميلين ودمهم خفيف ونفسه الدكتور عبدالكريم خفيف وبسيط التعامل

ماعجبنا مع انه صح :
طبعا هرجة انهم يقولولنا اقرأوو طول الوقت صحيحة ... حتى دكتور عبدالكريم طلب واجب واعطانا كتاب كبير عشان نقراه ونصورة واكيد انه الهرجة ماهي عاجبتنا بس والله بنستفييييد مرررة كتير منها وفي نفس الوقت اتحسن بحثنا في الكتب وقرأتنا واستوعابنا ..
حتى احيانا بنفهم اشياء غلط بس للأمانة نسأل اي احد في القسم بيجاوب بعد مايتأكد اننا فشلنا في الفهم  ويفصلنا الموضوع بالكامل ..
وحتى لو كان واجب والجواب خطأ كانو بصححولنا ... واحيانا بيقولولنا اسأله زكية ماتخطر في بالنا بس لما نفكر فيها نقول من جد ليش ... وطبعا نرجع للبحث في الكتب ( /:)



(12)
رجعنا للفيزياء يوم الاتنين وطبعا كنا كارهين الموضوع وكنا متوقعين اننا حنقعد بلا شغله او عمله ...
بس الحمد لله توقعنا خطأ ... الدكتور فتحي قال لإيمان وياسمين انهم يفتحولنا حالات قديمه  انتهت علاجها ونعمل لها( كنتور) تحديد ... اتحمسنا وصرنا نعمل تحديد للأعضاء في البدايه كان شوية صعب خصوصا انه الصور ماهي ملونه غير ابيض واسود بس شويه شوية صارنا اسرع

بصراحة اتفاجأت انهم اعطونا حالة زي كذا .. ولكن المفاجأة الاكبر لما ياسر (فيزيائي ) خلنا نعمل تحديد على حالات جديده وفي نفس الوقت بأسمه ... بصراحة اعطانا ثقة في نفسنا مرررة كبيرة ... هو اكيد عدل من بعدنا بس كون انه اعطانا حالات حقيقة ذا شي افتخر اني سويته ... حسيت انهم لما شافو جديتنا في الشغل وثقوا فينا اكثر <<< مابتمدح نفسها
صاروا هم كمان جديين في تعليمنا .... حتى تعاملهم اتغير بالمرررررره عن اول ماجينا ... يعني صاروا يعبرونا اكثر ويشغلونا اكثر

بعدين رحنا مع فهد (فيزيائي ) نشيك على جهاز الفلوروسكبي ... كان بيعمل اختبارات كثيرة عشان يتأكد من الجرعه وجودة الشعاع ... الخ
طبعا كون اننا رحنا مع فهد ماجات كذا من حالها ... احنا طلبنا من الدكتور فتحي اننا نشوف كيف يشيكو على الاجهزة .
اليوم اللي بعده رحنا على جهاز جديد وكان من مهام الفيزيائي انه يشوف الاخطاء اذا كانت موجوده وفي نفس الوقت يعمل تقرير للمستشفى والادارة على حسب هذا التقرير تسمح او تمنع استخدام الجهاز ..
الجهاز كان في المبنى الجديد لطب القلب في غرفة القسطرة اللي بيصير فيها عمليات القلب ... ولانه المبنى جديد وقفنا العسكري وجلس يستفسر من فهد سبب مجيئنا لهناك .... المهم شرح له الموضوع وفهمه وسمحلنا نروح نشوف الغرفة .
الغرفة مرره تفجع فيها جعازين فلورسكبي ولازم يشيك علة كل جهاز وفيها حاجات طبية كتيرة تفجع ... يعني لما الواحد يكون مريض مايحتاج انه يخدرووه لانه حينفجع ويدوخ من حاله هههه ...الله يشفى مرضانا ومرشى المسلمين

المهم جلس يعمل حاجات مره كتيره وجانا رمضان وهو ما خلص

بدأت احب القسم ... والجلسه فيه ... وبدأت افهم شويه عن اللي بيسووه
طبعا واحنا في القسم هالكناهم اسئلة وهم هلكونا واجبات ههههه ... بس ترا واجباتهم سهله ومايحتاج لها غير انك تقري او تسألي اللي هناك وهم يجاوبوكي وبس .

(13)

الاسبوع الخامس
وجاء عبدالحميد ^____^ وبدأ الرعب ...

الاسبوع الاخير من شعبان ...
- السبت انتهت اجازة الدكتور عبدالحميد وجانا مرووووق ماشاء الله عليه ... شافنا وسألنا ايش ناوين تسوو في المستقبل
طبعا احنا لاجواب لاننا بصراحة محطمين من قسمنا لاننا ماكنا نعرف ايش شغلتنا في الحياة ومن بعد دورة الدكتور سمير صارت عندنا خلفية بسيطة ومؤلمة الى حدما ...
المهم قالنا يوم الثلاثاء مطلوب منكم عرض ( برزنتيشن ) عن اللي عملتوه خلال الشهر الماضي ... عن اي موضوع ممكن تتكلمو عنه
بس وراح .... فجانا الدكتور فتحي وجلس يكلمنا وقالنا انا متأكد انه عبدالحميد حيسألكم تاني ايش ناوين تسوو وجلس يقولنا عن الاماكن اللي ممكن اننا نكون فيها ... اما قسم التشخيص او قياس الجرعات او الطب النووي او الحماية من الاشعاع ... واتكلم حاجات كتيرة ما افتكرها لانو كان تفكيري كله عن البرزنتيشن وايش اللي حنسوي فيه .
في البداية اخترنا اشياء كتيرة ورحنا نسأل ياسر عن انه هل ينفع او نزيد ... فقال لنا لاتتوسعو وتتوهوو لان عبدالحميد حيسأل في اي شي اتكلمتو عنه فقللنا العرض بس اتعمقنا اكثر في اللي حنقوله .

- الاحد جانا الدكتور عبدالحميد وكما هو متوقع سألنا عن امالنا في المستقبل ...
قلنا له مافي طموح اننا نكمل عشان الظروف ماتسمح السفر الا بمحرم ... بالاصح احنا عقدنها لنفسنا
لكنه سمعنا وبالعكس اعطانا امل في انفسنا وثقة وكلمنا عن التخصصات المتاحه والمطلوبه في كل قسم واماكن العمل
( بصراحه هو مررررره طيب بس اسلوبه يفجع شويه وهذا ناتج من طبيعة البلد اللي كان عايش فيها )
كان كلامه صحيح وبالنسبالي اعطاني دفعة كنت مستنيتها , واخر كلامه قال : ماتفكرو في (الحرم) وتعقدوها , انتم بس جيبو ورقة البعثة في ايدكم وبدل (الحرم) يجيكم عشره <<<<ههههه الحرم يعني محرم عنده ^____^

- الاثنين رحنا مع تغريد وشفنا غرفة العلاج القريب (البراكي ثيربي)  , وشرحت لنا ماشاء الله عليها كل شي وشرح ممتاز
شفنا كل شي من الـ QA  الى ال Plan .

- الثلاثاء كان اليوم اللي لازم يكون فيه البرزنتيشن ... والتوتر فوق التوقع , كان المفترض انه العرض يكون الساعة 2
واحنا يومتها بس ندعي يعدي اليوم على خير .... لدرجة انه كل اللي في القسم يعرف انه عندنا برزنتيشن صار يهدي فينا واتوتر معانا
دكتور نور ودكتور فتحي وياسر ... واتوقع حتى الباقين كان ممكن يصيرلهم زي كذا , بس احنا ماقلنالهم انو عندنا عرض عشان مايحضروو ونتوتر اكثر ....
المهم جات الساعة 2 وعدت  والدكتور عبدالحميد كان مررة مشغول وفي الاخير انتهى اليوم وما عملنا العرض ^_^
كلهم قالوا لنا شكلكم بتدعوو كتير واتأجل الى زمن غير محدد هههه ... الحمد لله عدت على خير

- الاربعاء صرنا نطبق اللي اتعلمناه على البرنامج يعني شوفنا الفرق بين الــ SSD و SAD  ومتى نختار هذه او هذه التقنية
وسوينا حاجات كتير ماكنا متوقعينها وخلص الشهر وجانا رمضان ...


(13)
الاسبوع السادس بداية دوام رمضان في الحرس ...
طبعا الاشكال كلها تحزن خخخ لسه ما اتعودنا على الدوام
الحال صار احسن من اول .... صرنا نعرف اشياء اكثر
الدوام مرره قصير من 8 الى 2 ظهرا ... احنا اخترنا هذا الوقت ... ماجبرنا على شي بس المطلوب اننا نداوم 6 ساعات في رمضان في اي وقت نبغاه لين العصر .
صار تعاملهم معانا افضل بكثير عن السابق , وكل يوم بنتعلم شي جديد .



(14)
الاسبوع السابع
جاتنا حالة العلاج القريب (البراكي ثيربي ) ... كانت لوحده كبيرة في السن الورم في عنق الرحم فماكان يحتاج لها غير خط علاج وحده بأسمها يبدأ الجهاز يبرمج نفسه حسب الخطه كل يوم فيزيد الوقت للعلاج لانه النشاط الاشعاعي للمصدر بيقل .
في حالات تانيه تحتاج انه يعملو عمليه للمريض عشان يثبتو اشياء داخله وكل يون تتغير خطة العلاج لانه التثبيت بيتغير .
المهم في الحالة اللي شفناها كان الدكتور محدد 5 جلسات للعلاج , فكان العلاج من السبت للأربعاء
الاختلاف بين البراكي واللينر انه هذا مصدر مشع يدخل داخل المريض .. بينما اللينر فهو علاج بالكس ري (الفوتونات) او بالالكترونات .
كان لازم بعد كل جلسه اننا ندخل معانا كاشف (عداد جيجر ) علشان نتأكد انه المريضة ماكان فيها اشعاع يعني بمجرد انتهاء الجلسه المفترض انه المصدر المشع يرجع مكانه والمريضه تكون خاليه من المصدر , وهذه العملية جدا ضروريه لانه في مستشفى اهمل هذا الكشف مما ادى انه المريضة خرجت من المستشفى والمصدر داخلها ... وبعد كم يوم ماتت والسبب اهمال الكشف عليها بعد الجلسه .
وكمان صرنا نعمل كنتور كتير واعطونا مرضى حقيقين وهم عدلو على شغالنا
بصراحة اعطونا ثقة في نفسنا ماكنت متوقعتها منهم .



(15)
الاسبوع الثامن
اخر اسبوع للتدريب مع انه المفترض انه التدريب يكون يومين زيادة من الاسبوع اللي بعد هذا ...
اسبوع اقدر اسميه ( اسبوع اختبار المعلومات ) ... كان الدكتور عبدالحميد والدكتور فتحي يسألونا ايش اتعلمنا وكنا نجاوبهم
وحتى ماعادت في بالنا اسأله للي هناك ... فكان معظم الوقت وناسه معاهم وكيف درسو وفين درسوو
المهم جهزنا لهم توزيعة بسيطة كشكر مننا بس كنا نبغى نعطيهم هيا بعد تقيمنا عشان لاتكون رشوه ..
ذكرنا الدكتور فتحي انه لازم يقيمنا هذا الاسبوع , فصار مسكين يحاول يفضي نفسه عشاننا, سألتنا ايمان كم تتوقعو يكون تقيمكم
فقلت لها : 100 طبعا اللي نتمناه , فقالت  لو انه الدكتور عبدالحميد سألكم كنت قلتو انت كريم واحنا نستاهل
فمن كلامهم هي وياسمين انه معدلاتهم ماشاء الله قريب الـ 4 ومع هذا ما اخذوو ال100 كامله , لانه عبدالحميد كلمته انه اللي في كندا ما اخدوها يقصد الـ 100 .. المهم يوم الثلاثاء جاء الدكتور فتحي ونادى ايمان وياسمين ... طبعا حسينا انه وقت التقيم بس شويه يدخلنا ياسر ويعمل لنا  ok بيده وقال ان شاء الله خير دوبنا قيمناكم , عاد وقتها رجولي مدري ايش صار فيها .
المهم احنا ماخلصنا الاسئلة اللي لازم دكتور فتحي يسألنا هي , وعلى اساس الاربعاء يكمل معانا الاستجواب ^__^
نزلت الدرجة يوم الثلاثاء بس جينا الاربعاء كننا ماندري عنها , عشان الاسئلة اللي كان بيسألنا هيا الدكتور فتحي جدا مهمه ونختبر معلوماتنا بها , وجلس يمزح انه 90 حيعطينا عشان رمضان كريم ... واحناا يعني اننا ماندري نقوله زودها هههه


لما خلص اليوم شكرناهم واعطيناهم هدية بسيطة , وحسسونا انها مرره كبيره ... ردة فعلهم جميلة , وتمنياتهم لنا بالتوفيق اجمل .
وارشادهم لنا للمستقبل كان قمة الجمال والكرم منهم .

الحمد لله كلنا A+ وانا اقل درجة لاني غبت 3 ايام في فترة التدريب ... وللغياب درجات للأسف

افادة التدريب : 
كلمنا دكتور فتحي اننا نبغى ورقة تثبت اننا اتدربنا في الحرس , فقال في ورقتين ممكن تاخدوها وحده من مركز التدريب (اللي استخرجنا البطاقة من عندهم ) ووحدة من الدكتور عبدالحميد ... بس لانو دكتور عبدالحميد ما فضي لنا  فما اخدنا منه الافادة .
اما مركز التدريب ... فكلمناهم يوم الاثنين اننا نبغى افادة ,  فقالولنا اخر يوم تدريب ... نروح مركز الامن ونسلمهم البطايق .. وهم يعطونا ورقة ناخدها لمركز التدريب ... وسوينا اللي قالوه تمام وماقصروو اعطونا الافادة .


(16)
على الرغم من قصر فترة التدريب الا اني اتمنى انه يوصل شكري هذا لــ..
- دكتور فتحي ... شكرا لانك سمحت لنا اننا نروح الاقسام اللي نبغاها بدون تقيد ... وانه كنا كالحمل عليك فتعبناك ... ان شاء الله في موازين حسناتك .

- ايمان ... الانسانه الجميلة شكرا لشرحك الممتاز و لكل المعلومات اللي اعطيتينا هي وانك اتحملتينا وانك لسه عرضتي مساعدتك لنا حتى بعد ما انتهينا من التدريب ... مرررررره شكرا انك اعتبرتينا مهمين في المجتمع ^^... وان شاء الله في موازين حسناتك

- ياسر ... الانسان الجميل الذكي ماشاء الله ... شكرا انك سمحت لنا اننا نشتغل على حسابك ولأنك وثقت فينا فجعلت الباقين يثقوا فينا اكثر وقبلهم كلهك احنا صرنا واثقين بنفسنا اكثر ... شكرا للقصص اللي اخبرتنا بها اللي منها اتأكدنا اننا لازم نشتغل على انفسنا عشان نوصل للي وصلت له وانه مو كل شي بالسهوله يجينا .... ان شاء الله في موازين حسناتك .

-احمد ... شكرا انك علمتنا كتير اشياء في ال  QA  وانك ما اتضايقت من ركاكة لغتنا الانجليزية معاك وانك كنت بتحاول تفهم ايش اللي كنا نبغى نتعلمه منك   ...  ان شاء الله في موازين حسناتك  .

- سامر ... شكرا انك ربطت معلوماتنا بالواقع بأسلوب بسيط وسلس وانك اتحملتنا وشرحت لنا ومقصرت .

- ياسمن ... شكرا للمعلومات اللي اعطيتينا هي وانك فهميتنا اسلوب الحرس والاسلوب اللي لازم نكون فيه ... وللمعلومات الجميلة عن كيف حنتوظف وغيروو ...   ان شاء الله في موازين حسناتك .

- دكتور نور ... على الرغم من اني كنت اخاف منك في البداية ... لكن لما عرفتك وعرفت انه كلامك هو الصح ندمت على اني كنت اشرد عشان لاتسألني ^__^,... شكرا لأنك اتحملتنا ... وشكرا لانك بتتعلم عربي عشان طلبنا منك انك تتعلم اللغه هههه
...وبالنسبالي كان شرف ليا لما اعطيتني الحالة اللي كانت لك وخليتني اعمل كنتور لها فهذه لوحدها ثقة اعتز بها ... ان شاء الله في موازين حسناتك .

- فهد ... شكرا انك اتحملت اننا ندخل في شغلك ... ان شاء الله في موازين حسناتك .

- تغريد ... شكرا لشرحك للبراكي وانك خصصتي من وقتك عشان تفهمينا ... ان شاء الله في موازين حسناتك .

- دكتور عبدالحميد ... على الرغم من انه اسلوبك يوتر (يقلق على قولتك ) الا اني ماشفت منك الا خير .. كلامك كله صحيح ,واهتمامك بمستقبلنا خلاني اكثر حرصا واملا و ثقة في حياتي... ان شاء الله في موازين حسناتك .


مرره كانت احلى ايام مع انها كانت في اجازة وفي مكان بعيد ومشوار كل يوم ... بس من جد استفدت مرره كتير
وشكرا للاقسام الباقية انها استقبلتنا وعلمتنا وهم ماكانو مجبورين فينا ... ان شاء الله في موازين حسناتهم .